عمل بعجينة السيراميك مع القهوه والرمل | How to make air dry clay with coffee and sand

 مرحباً،

في هذا المقال طريقة لعمل اشكال بعجينة السيراميك سريعة الجفاف مع القهوه والرمل

الأدوات:

عجينة سيراميك - ادوات التشكيل للطين - اداه الفرد - اسفنجة وموية - سطح عمل - قطعة قماش - فرشه الوان - ورق صنفرة - مشرط - صمغ خشب - رمل - قهوه مطحونة - قهوه سريعه التحضير 

بالبداية بجرب العجينة مع الرمل

 

مافية شكل محدد ببالي يعني وانا اشتغل بشوف وش بيطلع معي بالنهاية 

بالنسبة للرمل كان فية شوائب وشخلته بالمشخل قبل ابدأ

 

في البدايه أخذت قطعة كبيرة من العجينة

فردتها شوي وحطيت كمية من الرمل

كورتها وبديت اعجنها الى ان اندمج الرمل مع العجينة بكل الجهات

كان الوضع فوضوي بس كملو اعجنو الى ان تتماسك العجينة

اللي لاحظته هو ان العجينة تصير قاسية جداً وصعب اعجنها بسبب الرمل ومهما بللت يدي والعجينة الا انها صعبه حتى في التشكيل

حاولت اسوي اشكال لكن مثل ماقلت العجينة ماتتشكل بسهولة صارت بس تتشقق 

فقلت اسوي شكل سهل مايحتاج انحنائات او اي شي ممكن يسبب شقوق وصدوع 

فردت العجينة واستخدمت كوب وقصيت الحواف 

بعدها قلت بسوي شكل قلب واثبته فوقها وتصير مبخره للبخور العود

وسويت قلب بنفس العجينة اللي فيها رمل

وعشان اثبتها في القاعدة لازم نخدش السطح عشان تثبت زين

وثبت القلب على القاعدة ورجعت ادمجه مع القاعدة بالأداة هذي

وبعدها حاولت انعم الشكل باداه التشكيل

 

ولأنها مبخره اخذت عود البخور ودخلتة في العجينة عشان ياخذ شكله 

و حاولت اخلي الحواف او الاطراف اعلى من القاعده بحيث يتجمع فيها بقايا البخور

واخر خطوه نمسح عليها بالاسفنجة المبللة وننعم الشكل

وتركتها تنشف على قطعة القماش

وببقايا العجينة اللي بالرمل سويت شكل قلب ونفس الشيء بعود البخور سويت له مكان 

التجربة الثانية كانت بالقهوه المطحونة

بنفس الطريقة اخذت قطعة كبيرة من العجينة واضفت لها القهوه المطحونة

وعجنتها الى ان اندمجت مع العجينة

كورتها

وفردتها على القماش

ونفس الشيء بالصحن حددت وقصيت الحواف بالمشرط

ونشيل الزوائد

قررت بالزوائد اعجنها واخليها قاعدة للصحن

فقلبت العجينة وخدشتها بهالشكل

ونفس الشيء بقايا العجينة عجنتها ومديتها بهالشكل وخدشتها 

وثبتها على الصحن وبنفس الطريقة السابقة ندمج القاعدة مع الصحن وبعدها ننعم الشكل بالموية الى ان يندمجون زين

ونمسح عليها بالاسفنجة المبللة ونتركها تنشف

شالو تلاحظون الفرق بين قبل وبعد ما امسحها بالاسفنجة

 مره مهمه هذي الخطوه عشان تبان معنا حبيبات القهوه

ونتركها تنشف

وبباقي العجينة سويت اشكال ثانية

وبعد مانشفو بديت اصنفرهم

خاصة اللي بالقهوه مع الشغل ولان كل شوي ابللها بالموية فصار لونها قهوه 

مع الصنفرة بتصير اوضح حبوب القهوه ولونها بيطلع اجمل

لو تلاحظون الفرق بين اليمين بعد الصنفرة واليسار قبل

 الفرق واضح بين قبل الصنفره وبعد

وبعد الصنفره امسح بقايا الصنفرة بمنديل مبلل

شفت طريقة وقررت اجربها 

وهي صمغ الخشب مع القهوه سريعة التحضير

برفق المقطع اللي شفتة بنهاية المقال 

لكن ماضبطت معي الصراحة

الطريقة هي قهوه سريعه التحضير مع صمغ الخشب 

يخلط لين يندمجون

وبعدها تلونون فيه القطع السيراميك

للأسف تكتل معي ما اعرف ليش

هل لان مفروض اقلل الكمية او نشف بسرعه ؟ ما اعرف

مره سيء التكتل لكن اللون حلو

لكن مسحته ورجعت صنفرتهم 

انا بالبداية كنت ابي الاشكال باهته او مات

بس قررت احط عليهم ورنيش عشان يوضح شكل العجينة اكثر 

مثل كذا طلع اللون افضل بكثير والرمل واضح

ونفس الشيء على الاشكال الثانية بعد مانظفتها 

الفرق واضح بين قبل الورنيش وبعد

وبس اتركهم ينشفون 

النتيجة النهائية

حبيت النتيجة وتعطي طابع قديم 

لكن مثل ماذكرت كان صعب جدا وقت التشكيل يصير فيها شقوق كثير 

يمكن السبب اني كثرت من القهوه ؟ ما اعرف 

لكن تجربه جميله والنتيجه مرضيه 

طريقة العمل على اليوتيوب: 

مراجع اخرى:

وفي حساب هواية على البينتريست بتحصلون افكار اكثر واشكال مختلفة 

تمت.