طريقة عمل حقيبة من الخرز | How to make a bead bag

 

مرحباً،

في اول تدوينة بتكون عن طريقة عمل حقيبة من الخرز، في اول تجربة لي كانت فيها اخطاء وكنت حاسه ان طريقة العمل معقده وصعبه 

لكن قررت اعطيها فرصة ثانية واجرب ! 

اكتشفت انها سهله جدا وكلها غرزة وحده (إن صح التعبير بتسميتها غرزة) ولاهي معقده ولا صعبة! لعل السبب في التجربة الاولى اني شفت مقطع واحد فقط لطريقة عملها وكان المقطع طريقته مختلفة عن اللي راح اسويه اليوم (برأيي الطريقة هذي اسهل) .

الأدوات : خرز - مقص - خيط سمك (ننتبه ان سمك الخيط يتناسب مع فتحه الخرز)

* الخرز الصغير لازم له مقاس خيط انحف لان الطريقة تتطلب ندخل الخيط اكثر من مره بالخرزة الوحده، كل ماكان حجم الخرز صغير بنحتاج خرز اكثر ووقت اكثر والعكس كذلك.

في البداية نقص الخيط على حسب حجم الشنطة اللي نبيه، هنا تقريباً قصيت 5 متر

(كل ماكان الخيط طويل بيكون شوي متعب ويتعقد، ومو مشكلة اذا خلص الخيط بنص الشغل نربطة ونبدا نكمل بخيط جديد سهل جداً)

الغرزة بإختصار: تشكيل ورده بـ 4 خرزات 

في البداية ندخل 3 خرزات بمنتصف الخيط وبالخرزة الرابعه راح ندخل الخيطين بشكل اكس X 

هنا صورة اوضح للخرزة الرابعه، هي ماراح تكون بالخيط اليمين ولا اليسار راح تكون متقاطعة مع كل الخيطين

ونشد الخيط ويطلع معنا شكل ورده 

اهم شي بعد كل ورده نشد الخيط بقوة لان اذا صار مرتخي راح يخرب الشكل النهائي ويصير فيه مطبات

(في نهايه التدوينة باشارك لكم النتايج اللي فيها اخطاء)

بعد مانسوي اول ورده نبدا ندخل خرزة على الخيط اليمين وخرزة على الخيط اليسار 

ونقفل الشكل بخرزة بالوسط بتقاطع X 

ونشد الخيط

نلاحظ انو في اول ورده اضفنا 3 خرز والرابعه قفلنا بها الشكل وهي كانت الاساس

ومن بعدها نبدا نضيف فقط 3 خرزات وحده بالخيط اليمين ووحده بالخيط اليسار والثالثة تقاطع بينهم 

لان الخرزه الرابعه هي من الغرزه اللي قبل فما نحتاج نضيف بكل مره 4 خرزات

ونكمل بنفس الطريقة سطر على حسب المقاس اللي نبغاه 

الطريقة سهله لكن تحتاج تركيز شوي، هي فقط غرزه وتتكرر 

عدا اذا وصلنا لنهايه السطر وراح نرقى نكمل السطر الثاني فيه اختلاف بسيط بس عشان نبدأ السطر الجديد

الاختلاف هو ان نضيف الخرزتين كلهم بخيط واحد (الخيط اللي على تحت) والخرزة الثالثه تكون تقاطع بين الخيطين

الخرزة الثالثة تتقاطع مع الخيط الثاني بشكل X

ويطلع معنا اخر ورده بالسطر

الفرق لما اضفنا كل الخرزتين بخيط واحد هو عشان يكون الخيطين على فوق عكس قبل لما كنا نحط بكل خيط خرزه 

والحين نبدا بالسطر الثاني، نضيف 3 خرزات بالخيط اللي يكون على اليسار 

الخرزة الثالثه بتكون تقاطع بين الخيطين مثل كل مره

ونشد الخيط بكل مره مهم جدا مانرخيه ابداً وخصوصاً ببداية السطر ونهايته

والحين بدينا بالسطر الجديد، هنا فيه اختلاف وهو اللي راح نكمل عليه الى النهاية

الاختلاف هو ان الخيط اللي على تحت راح ندخله باول خرزه تقابلة بالسطر اللي تحته عشان نربطهم ببعض

بعد مادخلنا الخيط اللي تحت باول خرزة تقابله 

نضيف خرزتين على الخيط اللي فوق وثاني خرزة بتكون تقاطع X مع الخيط اللي تحت

بعدها نشد الخيط وبيطلع معنا شكل الورده 

الاختلاف هنا وهو اللي راح نكمل عليه هو اننا بكل مره ندخل الخيط اللي تحت باول خرزة تقابلة من السطر اللي تحته

وثم نضيف خرزتين على الخيط اللي فوق بتقاطع الخرزه الثانيه مع الخيط اللي تحت 

ونكمل بنفس الطريقة

وعلى اخر غرزة بنهايه السطر ندخل الخيط اللي تحت بأول خرزة من السطر اللي تحته

ثم بنفس الخيط اللي تحت نضيف خرزتين

 

والخرزه الثانيه نفس الطريقة نسوي تقاطع X بكل الخيطين

وبكذا نقفل السطر

ونبدأ سطر جديد بنفس الطريقة الخيط اللي على تحت نضيف له هذي المره 3 خرزات 

والثالثه تكون تقاطع X بكل الخيطين

ونكمل بنفس الطريقة الخيط اللي على تحت مع اول خرزه تحت واللي فوق نضيف خرزتين ونقفلة 

صورة أوضح لطريقة التقاطع بالخرز X

نكمل بنفس الطريقة الى ان نوصل للحجم اللي نبغاه (هنا سويت 14 سطر)

الطريقة هي انو المستطيل راح نصفطة بحيث يطلع معنا شكل الشنطة مستطيل لكن اصغر

وعشان اسهل من ان نسوي كل جهه لحال ونضطر نربطهم ببعض

نشد الخيط زين ونعقده 

عشان اضمن انه ماينفلت عقدته وشديته بالزراديه مرتين

ثم نقص الزايد، يفضل نحاول ندخل الخيوط للخرز اللي تحته عشان ماتبين العقده 

الحين عشان نقفل الشنطة من على جمب نحتاج خيط ثاني ومقص وخزر

نصفط الشنطة، كذا راح يكون حجمها النهائي بس باقي نقفل الجوانب ونضيف مسكة

 نقص خيط مايكون طويل مره تقريباً متر

نصفط الشنطة بحيث تكون متطابقة كل الجهتين 

ندخل الخيط باول خرزتين تحت (لو افترضنا انها مقسومه بالنصف)

يعني اول خرزتين على اليمين من النصف الأيمن 

وبما ان الورده عباره عن 4 خرزات واحنا دخلنا الخيط بخرزتين معناته نضيف خرزتين والثانيه تكون تقاطع X تقفل الشكل 

بعد مانقفل الورده ندخل الخيط اللي على اليمين مع الخرزتين اللي بالنصف المقابل

ونقفلهم بخرزه وحده تتقاطع مع الخيطين

ثم الخيط اللي على اليمين ندخله بأول خرزه على اليمين ثم نضيف خرزتين بنفس الخيط والخرزه الثانية تكون تقاطع مع الخيطين ونكمل بنفس الطريقة

ممكن تحسون الامر معقد خاصةً هنا لكن سهل جداُ

الفكره ببساطة ورده بـ 4 خرزات ونشبكهم مع بعض 

كان صعب اني اصور الخطوات صور لكن بتكون اوضح بالفديو 

هنا لو تلاحظون الاساس الخيط من كل الجهتين فيه 3 خرزات من الوردات اللي قبل 

فاحتاج فقط خرزه تتقاطع مع الخيطين عشان اقفل الورده

ونكمل بنفس الطريقة ونشد الخيط بكل مره

لما نوصل لفوق نصير نضيف خرزتين وحده منهم نقفل بها الشكل بتقاطع

(اكتشفت ان هذا اللي صورته وممكن مايكون واضح، مقطع الفديو بيكون اوضح لكم)

بعد ماقفلت الحواف من كل الجهتين ابدا اسوي المسكة 

ادخل الخرز بالخيط واحدد المقاس اللي ابغاه 

ثم اقص الخيط واربطة باول خرزه من الجهتين

وبس! انتهينا 

وبكذا طلع معنا شنطة خرز كلاسيك 

سويت حجمين باختلاف بسيط قللت عدد الاسطر

وسويت بالخرز الصغير بس كان جداً متعب واخذ وقت اكثر ولأن مقاس الخيط كان عريض فكان متعب اني اسوي حتى التقاطع بين الخيطين بداخل الخرزه لانها صغيره

عشان كذا ذكرت لكم اذا بتستخدمون خرز صغير او فتحته صغيره لازم خيط بسمك ملائم له

اول شنطة عاليمين فوق هي كانت اول تجربة لي، اتبعت فيه مقطع عاليوتيوب راح اشاركه بنهايه المقال

مشكلتها ان ماكنت اشد الخيط وبعض الغرز كانو ناقصين خرز، يعني مو ورده من 4 خرزات نسيت خرزه فصار فيها فجوات

ومقطع اليوتيوب كان ان الطريقة بخيط واحد اسوي الاساس اللي تحت ثم اكمل باقي الشنطة على فوق 

هنا الفرق بين لما تشدون الخيط وبين لما ترخونه 

القطعه هذي سويتها ولا كنت اعرف ايش السبب وليش يطلع مو متساوي 

واكتشف ان لازم اشد الخيط زين مرره بعد كل ورده 

رحت بديت من جديد وسويت الشنطة الصغيره اللي تشوفون فوق 

مافكيت اللي غلطت فيها عشان اصور لكم الفرق بين شد الخيط وارخائة

وبس اتمنى ان الطريقة كانت واضحة، ولعلها بتكون اوضح في الفديو اكثر 

طريقة العمل على اليوتيوب:

هذا الفديو اللي اتبعته اول مره لو تلاحظون طريقة العمل مختلفة:

مراجع اخرى انصح بها :

هذا المقطع هو كان المرجع الأساسي للطريقة، وموجود بقناتها اكثر من طريقة واكثر من غرزه اذا حابين تتعمقون بالموضوع

وفي حساب هواية على البينتريست بتحصلون افكار اكثر واشكال مختلفة لحقائب مصنوعة بالخرز في لوحة bead bag

تمت.