طريقة عمل حقيبة من كانفس البلاستيك | How to make a plastic canvas bag

 

مرحباً،

تدوينة اليوم عن طريقة عمل حقيبة بالكانفس البلاستيك

الكانفس البلاستيك هو عباره عن قطعة بلاستيك مخرمه بفتحات

يستخدم بأكثر من طريقة وممكن نسوي فيه اشياء كثيره متنوعة

مثل شنط او علب او ميداليات حتى

كيف؟

بإختصار هو نقدر نقول نطرز عليه  

يعني هو مثله مثل هذاك القماش اللي كنا نستخدمه للخياطه والتطريز

نقدر نستخدم اي نوع من الخيوط سواء خيط صوف او غيره 

لكن مهم يكون عريض او اذا كان الخيط نحيف ندبله بأكثر من خيط

فيه طرق كثيرة للإبداع بها 

شفت شنط مستخدمين شرايط بدل الخيوط وطالعه حلوه مره 

فلا تحتكرون الموضوع على بس خيوط صوف لا ممكن نجرب بأكثر من خامه 

في هذا العمل استخدمت خيط صوف عريض وشكلة غير ما اعرف اسمه

كان مريح مره بالشغل وسهل خلصت العمل بسرعة

وجربت اسوي غيرهم بخيوط نحيفة ودبلتها ٣ خيوط

نوع الخيط كان متعب جدا في الشغل ويتعقد كثير

العمل كان شنطه صغيره بس طولت عليها اكثر من الشنطة الكبيرة اللي بالصوف

الأدوات : كانفس بلاستيك - مقص - خيط صوف - ابره بلاستيك - مسطرة - قفل شنطة مغناطيس - مشبك تعليقة لحزام الشنطة 

بالنسبة للحجم والشكل يعتمد على اللي تبغون

فيه طريقة ان نقص كل قطعة لحال وبعدها نجمع القطع مع بعض

وطريقة ثانية واللي هي راح استخدم تكون كلها قطعه

وحدة واخر شيء نشبك الزواية مع بعض

بالنسبة لي الثانية كانت اسهل بالعمل

لكن شوي يبيلها تركيز بالمقاسات وقت القص

هنا باترون للشكل اللي اقصده

والكانفس البلاستيك متوفر بأغلب المكتبات ومحلات أدوات الخياطة 

متوفر في مكتبة الشرق ومحل خيط الإبرة بسعر 4 ريال سعودي

لكن اذا تبون تسهلون على نفسكم لقيت باترون مقصوص وجاهز بشي ان حقيبة كانفس بلاستيك

نرجع للعمل

اول شيء بنحدد المقاس اللي نبغاه للشنطة

ونستعين بالكانفس نفسة انه مربعات

 

بحيث نقيس بعدد المربعات 

بالنسبة للمقاسات اللي استخدمت بذكرها تحت

واعتمدت على المربعات للقياس مو بالسم

حددت بالقلم وين اوقف وقت القص

بحيث يطلع مثل الباترون اللي فوق لكن المقاسات تختلف

لو تلاحظون لما وصلت النقط طلع واضح الشكل اللي اقصده

ونبدأ نقص على نهاية المربع 

مانبغى زوائد البلاستيك

وطلع معنا الحين الشكل اللي نبغى

والمقاسات بالمربعات مثل ماهو واضح بالصوره

واذا تبغون تغيرون الحجم اهم شيء تاخذون بعين الاعتبار ان اللي فوق هو الجهه اللي نقفل بها الشنطة فمانخليه طويلة

عكس اللي تحت لانها عباره عن المربع الاساس للشنطة

يعني الظهر والقاعدة والامام

والحواف اليمين واليسار انا خليتها شوي نحيفة وهذا بيأثر على مقاسات الشنطة اذا بتغيرون المقاس

لازم توزنون كل جهه 

مثلاً الحواف لو خليتها اعرض لازم اطول من حجم الشنطة من فوق وتحت

ليش؟

لأن راح ياكل من حجمها وتصير اقصر ويخرب الشكل 

فلازم توزنون كل شي قبل القص

 

ممكن ترسمون الباترون على ورق وتجربون قبل

عالعموم راح تفهمون ايش اقصد لما تجربون 

هنا مقاس الجهه العلوية 

وواضح لكم نظافة القص بدون زوايد 

هنا الحواف اللي اقصد 

أول شي ناخذ خيط الصوف بطول مناسب ونقصه

الأفضل ماناخذ طويل مره عشان مايتعقد معنا 

وعادي مو مشكله لما يخلص علينا نقدر نبدأ من جديد ونخفي النهاية 

بس اذا كان الخيط ملون نفس حقي نراعي نهاية اللون والبداية 

ندخل الخيط في الابره البلاستيك

ومن تجربة فية ملاحظات كثيرة عرفتها وقت ما اشتغلت على هذا العمل

مثل:

مقاس الخيط حقي مره عريض فكان لازم ابره فتحتها كبيره 

مو مشكله عندي ابر بلاستيك كثير ومقاسات مختلفه

المشكلة كانت لما ادخل الابره في الكانفس البلاستيك 

يا ان الابره كبيره فما تدخل 

او تدخل بس لان الخيط عريض فتعلق ماتدخل زين

او تدخل بصعوبة وبعض الاوقات ينكسر معي الكانفس البلاستك 

يعني المربع اللي مفروض ادخل فيه الخيط ينقطع ويصير مستطيل مع اللي جمبه

 

وهذا الشيء جداً مزعج ويخرب الشكل والمشكلة صارت اكثر من مره 

وللأسف مايترقع

اول شيء مثل ماذكرت فية اكثر من طريقة للعمل

ومجال الأبداع غير محدود

الطريقة اللي استخدمت بسيطة ولا فيها تعقيد

هنا مثال نموذج للغرز او التطريز او النمط اللي ممكن تتبعونة

الطريقة اللي استخدمت هي

نبدأ نعد من اخر مربع الى المربع رقم ٩ 

وندخل فيه الابره من الخلف

نسحب الخيط الى ان يبقى شوي بس 

نرجع ندخل الابره في اول مربع من نفس العمود اللي بدينا فيه

وبس !

ايه بس هذي هي الطريقة بإختصار نكررها الى ان نخلص السطر كله

مثل ماخلصنا العمود الأول نرجع ندخل الأبره في المربع رقم ٩ من العمود الثاني من الخلف

مثل ماهو واضح يعني من المربع اللي بعد العمود اللي سويناه

ونكرر الطريقة الى ان ندخل الابره في المربع الاخير من

السطر 

اهم شي مانشد الخيط مره لان النهايه ماربطناها ولا راح نربطها بس راح تثبت معنا وقت الشغل

لأن لو نربطها بيصير واضح عقده كبيره وبيخرب الشكل

واحتمال اساساً ماتثبت بحكم ان المربعات فتحتها كبيرة

وكملت على نفس الطريقة الى نهاية السطر

سهلة جداً ولا اخذ مني وقت لان الخيط عريض فما يتعقد معي كثير 

والحين عشان نبدأ السطر اللي فوق

من النهاية اللي من السطر الأول 

يعني من الجهه اللي فيها الخيط انتهى نرجع نعد كم مربع ثم ندخل الابره في العمود الجديد

هنا ماخليتها مثل قبل ٩ مربعات لا خليتها ٨ 

عشان ابغى القاعده حقت الشنطة تكون لها غرزة لحال عشان يصير اسهل انها تنصفط 

يعني دخلت الخيط عند اخر مربع قبل السطر اللي فيه حواف الشنطة مثل ماهو واضح

ورجعت اعيد نفس الطريقة 

ادخل الابره من ورا لقدام عشان اخلص العمود الاول وابدأ العمود الثاني

لكن الفرق هنا ان ندخل الابره في المربع اللي تحت 

يعني اللي فيه غرزة سابقة

ليش؟

عشان مايصير فيه فراغ واضح بين السطور

ومثل ماقلت الخيط اللي استخدمت كان سميك فكان صعب شوي ان المربع الواحد يمر فيه الخيط مرتين

ارجع ادخل الابره في العمود الثاني

واكمل للنهاية

لكن هنا انتهى علي الخيط

اللي اسوية اني ابقي جزء طويل شوي من الخيط 

ثم ادخلة تحت النسيج اللي سويناه

وبكذا اخفينا نهاية الخيط 

وننتبه افضل لنظافة الشكل ان اذا انتهى الخيط نخلي هذي الحركه على الجهه اللي بتكون من داخل الشنطة 

وابدا بخيط جديد من الفتحة اللي تحت بنفس العمود

وانتبه ان يبقى نهاية لطرف الخيط

 

ونثبتها تحت الغرز

وكملت لنهاية السطر

بعدها مثل ماقلت ابغى قاعدة الشنطة تكون ثابته لحالها

 

راح نعيد نفس الغرزة او النسيج لكن على مقاس الحواف حقت الشنطة

اللي هي عباره عن ٨ مربعات

اكمل السطر حق قاعدة الشنطة كلة بنفس الطريقة

واكرر نفس الغرزة على باقي الشنطة

 

لكن مثل ماذكرت قبل نراعي مقاسات الغرزة مقارنة باماكن الطي 

بعد ماخلصت الشنطة وعلى نهاية الحواف

بدال ما اقص الخيط وارجع اقفل الشنطة بخيط جديد

بنفس الخيط كان باقي كمية مناسبة

اللحين بنجي لطريقة تقفيل الشنطة او تجميعها مع بعض

بنفس الخيط راح نقفل الشكل بغرزة البطانية

 

سهلة جداً وتحلي الشكل مره

ندخل الابره باول مربعين متقابلين ونشد الخيط

ثم نرجع ندخل الخيط بالمربع الثاني من نفس الجهه

يعني مو مثل عرزة السراجة بالمربع اللي بعده لا

بالمربع اللي من الجهه اللي بدينا فيها

ونعيد الطريقة إلى النهاية

مهم ننتبة ان ندخل الخيط بكل مربع ومقابلة

عشان مانغلط ويطلع مايل معنا

نسويها على الجهتين 

وبعد مانخلص نقص الخيط وندخلة جوا الغرز مثل قبل

وبنفس الغرزة نسوي على اطراف الشنطة 

تلاحظون الفرق بين قبل الغرزة وبعد

جداً تحلي وتفرق 

لكن مثل ماذكرت قبل من المشاكل اللي صارت

ان ينكسر المربع لما ادخل الخيط مع الابره لانهم عريضين

ولان المربع هذا على الزاوية فمافية شيء يدعمة 

فسهل ينكسر

حاولت اصمغه لكن ماضبط 

كملت عادي تخطيت المربعات اللي انكسرت

ونفس الشيء نسوي الغرزة للحواف اللي فوق بالشنطة

وبس خلصنا الشنطة 

باقي التعليقة والمغناطيس

اول شيء بثبت الحلقة بالمكان اللي ابغى

واخذ الابره والخيط واثبت بها الحلقة

بحيث ادخلها بالمربع اللي تحت ثم اثبتها بالخيط على المربع اللي فوق

انا ثبتتها بس ربطة وحدة لكن بعد ماخلصت اكتشفت انها تتحرك الحلقة وتميل

فأفضل تتثبت على امتداد الحلقة

ونربط الخيط اللي مثبت لنا الحلقة بعقدة

نثبت الحلقة الثانية بنفس الطريقة وعلى نفس الامتداد

الحين باقي السير حق الشنطة

للأسف الخيط خلص ولا بقى الا هذا الجزء

كنت ابغى اسوية بشكل جديلة او غرزة بالكروشية

لكن الخيط قديم عندي ولا اذكر من وين اشتريتة

 

فخليتة سير عادي خيطين 

ربطت نهاية الخيط بعقدة

ثم دخلت السير في التعليقة

ورجعت دخلت السير بهالشكل

سويتها على كل التعليقتين

واثبت الخطاف على التعليقة اللي بالشنطة

هنا الغلط اللي اقصد

اني ثبت التعليقة بخيط واحد 

فصار يتحرك معي

الأفضل اثبته على الأمتداد كلة

طلع معي شكلها كذا

لا بأس به مو مره راضية على السير بس عادي

الحين بثبت القفل المغناطيس

نوقف الحديدتين بهالشكل

ثم ندخلها تحت الخيوط والغرزة

ونضغط عليها بحيث تمسك 

واثبت اللي فوق بنفس الطريقة

واطابق مكان المغناطيس اللي فوق مع اللي تحت

وبس اقفلها وتطلع معنا بهالشكل

نقطة ثانية لاحظتها

ان المغناطيس ينفك اذا جيت افتح الشنطة

ورجعت اثبته لكن يظل ينفك بكل مره 

النتيجة النهاية 

حلوه ومرتبة 

ونوع الخيط يفرق كثير بالشكل 

لو كان صوف عادي او هذا او غيره

وحتى الغرزة اللي على الحواف والاطرف مجملة الشنطة

وهنا سويت شنط صغيره لكن مو بنفس الطريقة ولا بنفس الخيط

الخيط هذا النوع كان متعب جداً ويتعقد كثير

دبلت الخيط مرتين او ثلاث مرات وقت الشغل

ونفس الشنط ماسويتها مثل الاولى كلها قطعة وحدة

لا كل جهه لحالها مثل القاعدة مستطيل لحاله

والحواف كل مستطيل لحاله 

وبعد ماخلصت جمعتهم كلهم بغرزة البطانية

استخدمت سلاسل معدنية كسير للشنط

ووحدة من السلاسل كان فيها فتحات فدخلت فيها

 الخيط البنفسجي عشان يحلية

هذي ثبتت فيها زرار وخيط للتقفيل

وبس

الطريقة سهلة ومثل ماقلت مجال الأبداع فيها غير محدود

السلبية الوحيدة كانت ان البلاستيك ينكسر معي وصارت اكثر من مره

لكن الكانفس البلاستيك له اعمال كثير لا تحصر 

والخامات اللي ممكن نستخدم كثير من خيوط خيش وصوف وشرايط وغيرها

وشفت اعمال كثيره وحلوه للشنط واحجام واشكال مختلفة

طريقة العمل على اليوتيوب:

مراجع اخرى:

وفي حساب هواية على البينتريست بتحصلون افكار اكثر واشكال مختلفة لحقائب مصنوعة بالكانفس البلاستيك في لوحة plastic canvas bag

تمت.