طريقة عمل باليت خلط الألوان بعجينة السيراميك | How to make a mixing paint palette with air dry clay

مرحباً،

في هذا المقال طريقة لعمل باليت خلط الألوان بعجينة السيراميك اللي تجف بالهواء بدون حرق 

طبعاً نعرف ان عجينة السيراميك تجف بالهواء واذا تعرضت للبلل راح تخرب وتموع مره ثانية!

لكن الحل هنا هو اننا نحط طبقات حماية بعد مانخلص، كل مازاد عدد الطبقات كان افضل 

طبقة الحماية ممكن نستخدم:

 ريزن طبقة وحدة منة تكفي 

ورنيش ويكون اكثر من 4 طبقات

او اي مادة عازلة ممكن صمغ الخشب او صمغ مود باج لكن يحتاج طبقات اكثر من الورنيش 

اما اذا بنستخدم عجينة سيراميك اللي تحتاج حرق هذا امر آخر، فضلت استخدم اللي تجف بالهواء لانها اسهل من ان ادور مكان يحرق لي العمل 

الأدوات: عجينة سيراميك تجف بالهواء (حجم العجينه المستخدم الكبيرة) - ادوات التشكيل للعجينة (نحتاج الشكل اللي بالصورة الثانية) - اداه فرد - اسفنجة وموية - سطح عمل - قطعة قماش - ورنيش حماية - فرش الوان - مسطرة حديد - ورق صنفرة 

هذي الاداة اللي نحتاج اللي فيها حديد مفرغ

هذا نوع الورنيش اللي استخدمت 

من التعليمات اللي مكتوبة انه يجف ب 15 دقيقة

وانه مايعطي لون اصفر، إذا تعرفون الورنيش او حتى الريزن مع الوقت يقلب لونه مايكون شفاف مره، لكن اللي شفته انه يعطي لون اصفر يمكن لاني كثرت بمنطقة وحده ؟ ماعرف لكن حلوه حمايته ولمعته متوسطه مقارنه بلمعه الريزن

اول شي ناخذ الكمية اللي نحتاج من العجينة

بناءً على حجم الباليت اللي نبغى 

ونحط بعين الإعتبار ان يكون الباليت سميك لان راح نفرغ اماكن المربعات حقت الالوان فلازم يكون سميك 

نعجن العجينة ونكورها، واذا حسيتو انها شوي ناشفة بللو يدكم بالموية شوي واعجنو

ونضرب العجينة على الطاولة اكثر من مره عشان نطلع الهواء منها

نحطها على قطعة القماش افضل عشان بعد ماتنشف نقدر نشيلها بسهولة 

نفردها بأداه فرد العجين على المقاس اللي نبغى واهم شي مانفردها مره نحتاجها تكون سميكة

ونقصها بالمسطرة الحديد تعطينا خط مستقيم اسهل لنا من المشرط

الشكل اللي بسوي هو مستطيل تقريباً

باقي العجينة نرجع نعجنها سوا ونحفظها بالكيس 

وهنا واضح لكم السمك للعجينة

 ممكن تكون اقل بس اهم شي وقت مانفرغ المربعات مانحفر بزيادة

ثم نبدا نفرغ اماكن الالوان بأداه الحفر  بالشكل والمقاس اللي نبغى 

أهم شي مانحفر بعمق بزيادة

اذا بدت تجف معكم امسحوها بمويه بالاسفنجة

انا مخليتها سميكة بزيادة عشان اماكن الألوان تكون عميقة

بعد ماخلصت من التفريغ راح انعم العجينة بالموية 

وباقي العجين نفس الشيئ نعجنه ونحفظة بالكيس

ناخذ الاسفنجة ونبللها بشوي مويه ونمسح على العجينة كلها

ونبدأ ننعم الاطراف بالاصبع 

او بأدوات التشكيل نحاول نخليها متساوية قدر المستطاع

وبالأصبع افضل

لو تلاحظون الجهه اللي نعمناها عن الجهه اللي قبل فرق 

وننعم الأطراف والزاوية 

حاولت انعمها قدر المستطاع لكن لاتزال فيها تعرجات 

بس عادي شكلها احلا وهي غير متساوية

نخليها تنشف بالهواء يوم او يومين (انا تركتها اسبوع) افضل لانها سميكة فعشان تنشف من جوا بعد 

اذا نشفت من فوق نقلبها تنشف من تحت

العجينة اللي استخدمت كانت اكبر حجم فسويت بالباقي اكثر من باليت وجربت طرق واشكال غير

اولها اخذت نفس مقس الباليت المعدني وقصيت العجينة 

هالمره السمك كان اقل لان الفتحات مابيها عميقة

ونفس الشيئ فرغتها باداة التفريغ بس ماحفرت بعمق

ونعمت العجينة بنفس الطريقة

وهنا سويت حجم صغير دائري

لكن هالمره ما استخدمت اداه التفريغ فقط ضغطت عليها باصبعي على خفيف لانها مو سميكة

طلعت بشكل وردة

نفس الشيئ نعمتها بالمويه 

وتركتهم ينشفون بالهواء

وسويت اثنين زيادة بشكل غير متناسق وبنفس الطريقة الثانية بدون أداة التفريغ 

بعد مانشفو راح نصنفرهم بورق الصنفرة

راح يطلع غبار كثير وقت الصنفرة فنحط تحت الباليت ورق او اي سطح ممكن نشيلة ونكب الغبار بالزباله

هنا شكلها قبل الصنفرة

على اني حاولت اخليها ناعمة بس لاتزال مو مره

حتى الاطراف طالع فيها زوائد راح نصنفرها

الباليت طلع مقوس لاني شلته من القماش قبل ينشف ولا ضغطت عليه فطلع مقوس بالغلط

ناخذ قطعة من ورق الصنفرة ونصنفرها كلها من جوا ومن الاطراف والحواف 

بعد مانصنفرها نمسحها بمنديل مبلل او ننفض عنها الغبار بفرشة

نجي لآخر خطوة وهي الأهم

الورنيش او الحماية 

القطعة الأساسية قررت اخليها على لونها الطبيعي بس الباقين راح الونهم

نحتاج الورنيش وفرشة وباليت عشان نحط فيه الورنيش 

(كان اسهل اني احط الورنيش على طول عالقطعه ثم اوزعه لكن جربت واذا ماحركته بسرعه يصير فيه اثر بقع فافضل نحطه بصحن او باليت ثم ناخذ منه)

* اول شيئ نخض الورنيش قبل نستخدمة حسب ماهو مكتوب بالتعليمات

وندهن فيه الباليت طبقة خفيفة ماتكون متكتله (مثل ماقلت قبل بعض الاماكن كان فيها تكتل بالورنيش فصار لونه مايل عالاصفر)

نغطي الباليت من كل الجهات مانبقي ولا زاوية مايجيها

بعد ماتنشف الجهة العلوية نقلبة وندهن الجهة السفلية والزوايا والأطراف

ونكرر الطريقة الى 4 او 6 طبقات من كل الجهات

بين كل طبقة وطبقة نخلية ينشف زين مكتوب 15 دقيقة لكن فضلت اتركة بين طبقة وطبقة اكثر من ساعة

وبعد كل استخدام ننظف الفرشة بالموية مانترك الورنيش ينشف عليها عشان ماتخرب

شكلة بعد اكثر 4 طبقات ورنيش (ما اذكر بالضبط كم حطيت لكن اكثر من 4 )

صار يلمع ولونه تغير شوي عن لون العجينة الاساسي صار كانه بيج او سكري بس حلو

الباقين قررت الونهم

احتجت باليت الوان والوان اكريليك وفرشه عادية وفرشة اسنان وكوب موية

هذي بس لونتها ابيض

الثانيه خلطت نقطة اصفر مع ابيض 

احتجت طبقة وحده بس للتلوين

الثالثة حطيت نقطة اسود وازرق وابيض كثير

لونته من فوق لان ماكفى اللون ولا بغيت اخلط ويطلع لي درجة غير

بس افضل لو لونت الباليت من كل الجهات لان انقشع معي شوي 

هذا قررت اسوي عليه حركة الرش اللي تكون نقط عشوائية

اخترت لون اسود وكحلي وحطيت مع كل لون نقطه مويه عشان اخففه

الطريقة اني اغمس فرشة الاسنان باللون ثم ارش الباليت

لكن لان كثرت لون عالفرشة فبالغلط نقط بقع كبيرة 

رحت لونته ابيض ورشيته مره ثانية

ونفس الشيئ حطيت عليهم طبقات ورنيش

النتيجة النهائية

حبيت هذولي اكثر من اللي استخدمت فيها اداه التفريغ

جربت استخدمها وبعد الاستخدام اغسلها ولا بقى اثر للون

بس عشان يروح اللون زين اخذت فرشة وغسلت الالوان من الباليت بخفيف 

اهم شي ما نمخش طبقة الحماية عشان مايتسرب لها موية

الطريقة عاليوتيوب:

مراجع أخرى :

وعلى حساب هواية في البينتريست بتحصلون افكار مختلفة في لوحة clay paint palette

تمت.